ЕВРОПСКА ЕПАРИЈА
Православниот Македонец длабоко во себе ја носел верата и традицијата насекаде па дури и кога ја напуштал родната земја во потрага по подобра егзистенција.
Така нашите први иселеници во Скандинавија понесени од желбата да имаат своја црква се организирале во црковни општини уште во 1973 година.Подоцна нивниот пример ќе го следат и други општини низ Европа.
Но сепак најголемата експанзија на формирање на црковни опшини се случува после референдумската одлука за самостојност на нашата татковина.
Така се раѓа и идејата за формирање на Европска епархија која ќе ја координира работата на сите дотогаш формирани Македонски православни општини на тлото на Европа.
Со одлука на Светиот архиерејски синод на Македонската православна црква, а потврдена на Архиепископскиот црковно-народен собор во катедралниот храм „Света Софија“ во Охрид, одржан на 04.12.1993 година, е формирана Европската Епархија, а на истиот собор за Архиепископ на Македонската православна црква е избран тогашниот Митрополит Повардарски г. Михаил кој својата прва канонска визитација надвор од границите на Македонија, ја прави во црковната општина „Свети Никола“ во Мајнц. Во придружба со Архиепископот г.г. Михаил е тогашниот Митрополит г. Стефан, протојереј Стојко Ристовски и првиот македонски парох воопшто во Европа, протојереј ставрофор Блажо Кожарски, кои со архиерејска света Литургија во тогашната придружна просторија при католичката црква „Свети Бернард“ во Мајнц, Бреценхајм го започнаа формирањето на управните тела и органи, во чиј состав како мирски лица влегоа првиот претседател на црковната општина „Свети Никола“ од Мајнц – Јован Зафировски, Миланка Тосева од црковната општина Свети „Кирил и Методиј“ од Дортмунд, и други членови од другите црковни општини од Германија и Европа.
На Црковно-народниот собор во Охрид 1995 г. се потврди оваа одлука а на седницата на САС на МПЦ одржана на 25.08.1995 г. за прв надлежен архиереј е избран митрополитот г. Горазд. Од 2006 година како надлежен архиереј за оваа епархија е поставен митрополитот г. Пимен.
Во рамките на епархијата се изградени и се осветени три нови цркви „Свети Наум Охридски“ во Тринген Швајцарија, „Свети Наум Охридски“ во Малме Шведска и „Св. Никола“ во Мајнц Германија.
На 26 октомври 2014 година, во Загреб, се удрени темелите на црквата „Св. Злата Мегленска“ како прва македонска црква во Хрватска
Исто така во 2019 година се удрени темелите за нова црква во МПЦ „Св. Кирил и Методиј“ Дортмунд Германија.
Епархијата денес има вкупно 41 црковни општини и е поделена на четири архиерејски намесништва, и тоа:
Во европската епархија има 23 редовни свештеници, од кој што осум свештеници се во Германија, по двајца во Италија, Швајцарија, Словенија, Хрватска, Шведска и Австрија, и по еден во Холандија, Англија, Франција.
Канцеларијата на епархијата е во Скопје на Партизански Одреди бр.12, 1000 Скопје, Р. Македонија